Inyathi Park Nuus Oktober 2022

1 November 2022

Geagte kollega

Buffeljagkompetisie

Ons het op 1 November 2022, die trekking gedoen in die buffeljagkompetisie wat SA Jagter en Rhino Bullets die afgelope tyd bemark het. Lawrence Meintjies is die gelukkige wenner. Vir diegene wat nie kan glo hoe vinnig nuus op sosiale media versprei nie, die trekking is kort na 10:00 op 1 November in die teenwoordigheid van ŉ verteenwoordiger van die Nasionale Loteryraad, mnr. Patrick Magoro, gedoen. Gert van Schalkwyk, SA Jagters se ouditeur van Van Sitterts Ouditeure, het die inligting geverifieer. Ek het Lawrence Meintjies om 10:31 gebel om hom mee te deel dat hy die gelukkige wenner van die jagpakket is. Daar is reeds vreemde stories en venynige kommentaar in omloop op sommige sosiale media oor die wenner. Dit staan enigeen vry om die proses na te gaan. ŉ Video-opname van die trekking is op SA Jagter se Facebook-blad beskikbaar.

SA Jagterswinkel

SA Jagters se winkel wat jare lank reeds by Inyathipark sake doen, is onlangs verbeter en die produktereeks sal aansienlik uitgebrei word. Die nuwe winkel sal na verwagting op 14 November 2022 open. Klante kan ŉ paar spesiale aanbiedings te wagte wees wat dalk handige kersgeskenke kan uitmaak. Alle lede wie se ledegeld tot op datum betaal is, ontvang 10% korting op enige aankope by ons eie winkel.

Beurtkrag en telefone

Alhoewel die beurtkrag wel verminder is, is daar steeds enkele probleme met SA Jagters se telefoonstelsel. Sommige van die probleme is opgelos, maar ons het steeds nou en dan onderbrekings. ŉ Sterker UPS word volgende week geïnstalleer wat hopelik groot verligting sal bring. Indien u nie op die gewone kantoornommer (012 808 9300) kan deurkom nie, probeer gerus een van die volgende selfoonnommers:

Ontvangs: 082 848 8547
Vuurwapenhulplyn: 066 256 2916
Opleiding: 082 658 6680,
Finansies: 082 727 5158
Jagterswinkel: 066 231 8185

Indeling van die nuusbrief

Belangrike inligting en boodskappe verskyn eerste in die nuusbrief en herhalende inligting verder aan.

Lede wat min tyd het om te lees, kan dus op die eerste deel van die nuusbrief fokus vir nuwe inligting en die res vir later los.

Nuwe boodskappe

Skietsake

4.1. Haelgeweerskiet

Na afloop van die Browning SA Jagters Haelgeweerkampioenskap is drie spanne gekies wat op 15 en 16 Oktober 2022 by Hippo Creek skietsentrum op uitnodiging deelgeneem het aan die SA Fitasc Compak Sporting Grand Prix. Hierdie spanne het hulle baie goed van hul taak gekwyt. Drie van SA Jagters se skuts het onder die top 20 in die kompetisie geëindig. Baie geluk aan die spanne met hulle goeie prestasie.

4.2. Ander nasionale sportskietbyeenkomste

In Oktober 2022 het ons ook al die ander nasionale skietkampioenskappe gehad, synde:

Nasionale Limited Bolt Action Kompetisie (15 Oktober 2022)
Nasionale MDS-kompetisie (19 – 22 Oktober 2022)
Nasionale Sportskietkompetisie & IGRF (27-29 Oktober 2022)

Die wenners in elkeen van die verskillende klasse en kategorieë in hierdie kompetisies is elke week bekendgemaak en op SA Jagters se Facebook-blad gelukgewens. Die lys is net te lank om hier te publiseer. Baie geluk aan elkeen van die presteerders in hierdie kompetisies.

Baie dankie ook aan elkeen van die borge wat besondere moeite gedoen het en bydraes gelewer het om die skietkompetisies aangenaam te laat verloop. Hierdie laaste kompetisies is aangebied deur Sandrivier 58-tak op die Excalibur-skietbaan. Baie dankie aan elkeen van die lede van hierdie en ook ander takke wat gehelp het om die kompetisies suksesvol aan te bied.

4.3. Zeiss/Lammergeier Ghongskietkompetisie

Lammergeier-tak bied sedert 2008 jaarliks ŉ ghongskietkompetisie aan. Dit word in die veld geskiet en bestaan uit 30 skote oor onbekende afstande om jag te simuleer. Hierdie kompetisie is so gewild dat daar jaarliks sowat 200 skuts deelneem. Die moeite wat die takbestuur doen om die kompetisie glad te laat verloop en die borgskappe maak die geleentheid uniek omdat dit veral deelname deur kinders en vroue aanmoedig. Op Saterdag, 22 Oktober 2022 het 196 skuts in 49 spanne aan hierdie kompetisie deelgeneem.

Zeiss het vanjaar die kompetisie geborg en twee verkykers sowel as twee teleskope geskenk wat in ŉ gelukkige trekking as pryse aangebied is. Twee vroue het die twee Zeiss-teleskope en twee mans het die twee Zeiss-verkykers ontvang. Die gesamentlike waarde was ongeveer R50 000. Ons bedank die maatskappy Carl Zeiss vir hierdie besonderse borgskap.

SAJWV Kongres 2022

SA Jagters se Kongres vind op 5 November 2022 as ŉ virtuele byeenkom vanaf SA Jagters se nasionale kantoor plaas. Teen hierdie tyd behoort afgevaardigdes reeds al die nodige dokumente te hê. Enige afgevaardigdes wat dit nie ontvang nie, kan navraag doen by die spesifieke takvoorsitter.

Afgevaardigdes word ook herinner om vooraf SA Jagters se slimfoon App af te laai. Maak ook seker dat die toepassing bygewerk is en dat u dit kan gebruik. Die stemming vir enige saak waaroor op die Kongres besluit moet word, sal via die selfoon plaasvind volgens die selfoonnommer wat die afgevaardigde by registrasie verskaf het.

Spesiale aanbiedings

Humansdorp Koöperasie

In November 2022 bied Humansdorp Koöperasie steeds 10% korting aan lede van SA Jagters op die aankoop van alle Walther-lope.

Herhalende boodskappe

Lidmaatskap

Werf lede vir kommissie

SA Jagters se ledetal staan nou op 42 724.

Elke lid of tak wat 10 of meer lede per jaar vir SA Jagters werf, ontvang kommissie van tussen R100 tot R150 per lid. Meer inligting is hier beskikbaar. (MM lankal aangestuur)

Die Raad van SA Jagters het ingestem dat Takke wat lede wie se lidmaatskap weens wanbetaling opgeskort is, oortuig om te betaal, ook die bostaande kommissie sal ontvang. Meer inligting hieroor is reeds voorheen per afsonderlike e-pos aan Takvoorsitters gestuur.

SA Jagters het weer aansoekvorms vir lidmaatskap aan ŉ verskeidenheid handelaars verskaf. Aansoekvorms is beskikbaar by Dorothy Els by dorothy@sahunt.co.za

Fotografieklub

Die fotografieklub van SA Jagters lok steeds wye belangstelling. Gaan lees gerus meer hier oor die klub, geleenthede vir opleiding om beter foto’s te neem en maandelikse kompetisies en pryse. Hierdie verslag verskaf ook inligting oor die beste foto’s van die jaar en die Fotograaf van die Jaar.

Die wenner van die 2022 fotografiekompetisie word binnekort aangekondig. Hou die fotografie webwerf en nuusbrief dop hiervoor asseblief.

Doctari-messe

Die Doctari ivoormes-projek eindig binnekort. Daar is slegs 8 van hierdie messe oor. Plaas u bestellings so gou moontlik om teleurstellings te voorkom as u een van die laaste 8 messe wil bekom.

Belangstellendes kan R5 500 in SA Jagters se bankrekening betaal. Die rekening is by Absa en die rekeningnommer is 01443990077; met takkode 632005. Gebruik die verwysing Mes en u selfoonnommer. Stuur ook die betalingsbewys aan admin@sahunt.co.za

Gedenkboek

Die gedenkboek is steeds beskikbaar in A4-formaat teen R300 per boek. Die leergebinde weergawes is uitverkoop.

Bestellings: Plaas die korrekte bedrag (R300 vir die gewone boek) elektronies oor na die bankrekening van SA Jagters. Die rekening word gehou by Absa en die rekeningnommer is 01443990077.

Gebruik net u Lidnommer en Boek as verwysing. Maak seker dat u lidnommer korrek is anders kan ons nie die bestelling uitvoer nie.

Buck-knipmesse

Daar is slegs 25 van die beperkte reeks Buck-knipmesse teen R1 000 elk beskikbaar. Hierdie knipmesse het ivoorinlegsels op die hef met SA Jagters se logo op die hef gegraveer. Plaas die R1 000 elektronies oor na die bankrekening van SA Jagters by Absa, rekeningnommer 01443990077. Gebruik u lidnommer en Knipmes as verwysing. Stuur die betalingsbewys saam met u lidnommer en kontakbesonderhede aan Realda Goosen by realda@sahunt.co.za